Los voceros de los grupos parlamentarios de la Xunta Xeneral del Principáu d'Asturies (XXPA) algamaron esti llunes un acuerdu definitivu pa reducir gastos materiales, de personal y l'asignación económica a los grupos que va suponer un aforru total cercanu a los 500.000 euros.

Na sesión d'esta mañana, los voceros establecieron como midíes d'austeridá un axuste de más de 120.000 euros na asignación de los grupos parlamentarios, introduciendo criterios de proporcionalidá al númberu de diputaos.

En concreto, hai conceptos significativos que se rebaxen como les dietes de los diputaos residentes n'Uviéu, que se reducen un 50 por cientu; la reducción de retribuciones de los voceros axuntos y dellos cargos institucionales; o les asignaciones a los grupos nun 20 por cientu.

Asina lo decidieron mientres la segunda reunión de la Xunta de Voceros entamada'l pasáu vienres, na que yá pactaron un acuerdu inicial que suponía una reducción d'unos 250.000 euros, vinculáu a la supresión de los cuatro coches oficiales y los cuatro xoferes qu'había hasta'l momentu, asina como a caltener en 35 los emplegaos al serviciu de los grupos y redicir los sos retribuciones.

El PSOE como partíu más votáu va contar con 9 emplegaos, dempués de ceder ún a UPyD, que va contar con 4, y otru a IU que va tener 6; mientres que tanto Foru como'l PP van disponer d'ocho emplegaos caún. Coles mesmes, los miembros de la Mesa de la Cámara van contar con dos secretarios caún y trés nel casu del presidente.

En declaraciones a los medios tres la xunta d'esti llunes, el voceru socialista, Fernando Lastra, afirmó que l'acuerdu yera "impresdindible" pal funcionamientu de la institución. "Cada vez qu'hai novedaes hai que a integrales", apuntó en relación a la nueva composición parlamentaria.

Lastra considera que se fueron "sacrificando les discrepancies" hacia les posiciones que más acuerdu concitaben. "L'acuerdu ye satisfactoriu pal mio grupu parlamentariu, a eso vinimos equí, vinimos p'acordar", remarcó.

Pela so parte, Mercedes Fernández (PP) resaltó que l'acuerdu foi "unánime" anque reconoció, sicasí, qu'hubo una "negociación complexa" na que'l so partíu tuvo que dexar "unos cuantos argumentos "nel tinteru". "Dende'l PP quisimos treslladar a la negociación la sensibilidá ciudadana", dixo satisfecha, dao qu'entiende que se llogró rebaxar "sustancialmente" el presupuestu de la Xunta Xeneral.

El diputáu d'UPyD, Ignacio Priendes, tamién se mostró satisfechu pol acuerdu que, afirma, superaría'l mediu millón d'euros. "El mensaxe d'austeridá que tamos llanzando a la sociedá había que facelo hacia dientro", defende, argumentando que nun se trata namás de repartir los recursos ente más grupos parlamentarios sinón qu'implica "una reducción importante del gastu en tolos conceptos".