El candidatu socialista a la Presidencia d'Asturies, Javier Fernández, señaló esti vienres que'l pidimientu del Gobiernu asturianu d'una llei d'endeudamientu por 480 millones, pa tratar inversiones previstes nel presupuestu prorrogáu, evidencia "otra irresponsabilidá" del Executivu autonómicu y el so presidente, Francisco Álvarez-Cascos (Foru).

A preguntes de los medios mientres una rueda prensa, Fernández argumentó qu'esta circunstancia debió prevese y proponese habese propuestu antes de disolver la Xunta Xeneral con motivu del adelantu electoral o "simplemente" nun disolver la Cámara.

Javier Fernández reconoció desconocer si ye posible aprobar nestos momentos una llei d'esi caláu y adelanta que de ser asina el PSOE va caltener la so postura constructiva". Sicasí, calcó en qu'esta situación "vien incidir y reforzar la idea d'irresponsabilidá del Gobiernu y de Cascos".

De la mesma manera, aprovechó pa criticar que Cascos se limite a "enviar cartes a Industria" ante la difícil situación en delles empreses, como nel casu d'ArcelorMittal, qu'entiende ye "el corazón" d'una industria vital" pa la comunidá. "Nun hai un gobiernu que encalce estes situaciones", llamentó mentando tamién los casos de compañíes como Alcoa o Rioglass.

Campaña austera y cercana

Fernández, que compareció, acabante reunise colos coordinadores de la campaña, afirmó que la so candidatura comprometeráse a desarrollar una campaña austera y averada pa "falar cola xente de los problemes de la xente".

Asina, anque prevén contar col apoyu del secretariu xeneral del PSOE, Alfredo Pérez Rubalcaba, y otros miembros relevantes de la executiva federal y el parlamentu, Fernández esplicó que "van promovese los actos de proximidá", que van ganar terrenu a los grandes mitinos, "que nun van ser munchos".

Averamientu ente pp y foru

El candidatu socialista a la Presidencia d'Asturies, que se mostró prudente al analizar la situación d'otros partíos, dao que diz que siempre ye "respetuosu" cola organización interna d'otres formaciones, sí señaló lo que-y paez un "averamientu" ente'l PP y Foru.

Pa ello, remitióse a les declaraciones cruzaes ente ambes formaciones nes que nun se llancen "dures acusaciones", sinón que Fernández observa más bien una "aproximación" en conociéndose la composición de les sos llistes electorales.

Con too, el tamién secretariu xeneral de la FSA-PSOE remarcó que nun s'atreve a facer camientos sobre lo que puea pasar "ente les dereches" dempués del 25 de marzu y repitió que'l proyectu socialista ye "l'únicu" que garantiza un gobiernu "estable y sensatu".

"Un gobiernu pa toos, non vengativu nin sectariu", remarcó. "Nun somos perfectos, podemos cometer errores y reconocémoslo", apuntó Fernández señalando, sicasí, que'l balance de los gobiernos socialistes ye "mui positivu". "Nun somos infalibles pero sí serios, que ye lo que-yos falta a otros partíos", dixo.