El Gobiernu d'Asturies proyectó la incorporación de terrenos de Peñamellera Alta y Peñamellera Baxa al Parque Nacional de los Picos d'Europa, antes qu'acabe'l 2012.

El Boletín Oficial del Principáu d'Asturies (BOPA) publicó esti miércoles los anuncios d'abertura de los periodos d'información pública de los espedientes d'ampliación del Parque en terrenos d'estos conceyos, informó la Conseyería d'Agroganadería y Recursos Autóctonos.

Ambos espedientes rexistraron una llarga andadura dende que la Comisión Mista de Xestión del Parque Nacional, nes sos sesiones de 20 de Julio del 2005, pal casu de Peñamellera Baxa, y de 31 d'Ochobre de 2008, pal de Peñamellera Alta, acordara encamentar a la Dirección del espaciu protexíu entamar los trámites pertinentes.

Asina, n'agostu del 2009, una vez instruyíos los espedientes, contando cola preceptiva conformidá del Patronatu del Parque Nacional y, en viéndose nel Conseyu de la Rede de Parques Nacionales, enviáronse a la Dirección de Parques Nacionales, dependiente del Ministeriu d'Agricultura, Alimentación y Mediu Ambiente, pa que se diera'l trámite d'información pública.

Sicasí, la necesidá de realizar ellaboraciones cartográfiques temátiques de meyor escala y de completar determinaos documentos, ficieron qu'antes de poder cumplir con dichu trámite, se llevara a cabu la tresferencia del Parque Nacional a les Comunidaes Autónomes d'Asturies, Cantabria, y Castiella y Lleón.

Una vez constituyíu'l Consorciu Interautonómicu que nesti momentu encárgase de la xestión del Parque Nacional, acordóse cola Alministración Xeneral del Estáu que fuera yá'l mesmu Consorciu'l que s'ocupara de los trámites pa ultimar estos espedientes.

Ampliación en peñamellera baxa

El conceyu de Peñamellera Baxa yá forma parte del Parque Nacional de los Picos d'Europa dende la so creación, en 1995. Cola inclusión de les 640,41 hectárees contemplaes nel actual espediente y que s'estienden nel entornu de les población de San Esteban y de Cuñaba, esti conceyu va pasar a aportar al espaciu protexíu un total de 1.161 hectárees, corrixéndose asina un error arrastráu dende la creación del Parque Nacional qu'asignaba a esti conceyu, nel espaciu protexíu, una superficie mui inferior a la que realmente aportaba.

Incorporación de peñamellera alta

Sobre l'ampliación del Parque Nacional con terrenos del conceyu de Peñamellera Alta vendría remediase una falta histórica, dao qu'esti conceyu refugó pasar a formar parte del Parque Nacional en 1995, dexando incompleta la porción asturiana de los Picos d'Europa aportada a dichu réxime de protección.

Nel 2008, esti Ayuntamientu adoptó, por unanimidá, solicitar la so inclusión nel espaciu protexíu. La zona qu'agora aportaría al Parque sería de 1.844 hectárees, correspondientes básicamente a dellos Montes d'Utilidá Pública, pese a que tamién son numberosos los particulares qu'emprestaron la so conformidá a que terrenes de la so propiedá pasen a tar dientro del réxime de protección de Parque Nacional.

PLAZOS

Una vez rematáu'l plazu de dos meses d'información pública, les alegaciones que se presenten van informase dende la Dirección del Parque Nacional y van incorporase a los espedientes. Éstos van remitise a la Conseyería d'Agroganadería y Recursos Autóctonos. Con posterioridá y a resultes de si ye necesario un nuevu Acuerdu del Conseyu de la Rede de Parques Nacionales, los espedientes van enviase al Conseyu de Ministros, que ye l'órganu que tien la competencia p'aprobar les ampliaciones tramitaes.

Si too se desarrolla según lo previsto, la incorporación d'estos nuevos terrenos al Parque Nacional tendría que tener vixencia antes del fin del presente añu 2012.