L'alcaldesa d'Avilés, Pilar Varela, preguntó esti martes al Gobiernu d'Asturies sobre la programación del Centru Niemeyer a partir del 16 d'avientu. "Qué piensen facer el día 16, qué programación hai pal 16, 17, 18, 19... Porque'l nuesu compromisu acaba'l día 15", dixo a los periodistes antes d'inaugurar una xornada sobre contratación pública y cláusules sociales que se celebra na ciudá.

Varela fizo referencia a que la cesión d'usu de les instalaciones a la Fundación Centro Niemeyer remata'l próximu 15 d'avientu y tovía nun hai acuerdu sobre lo que va asoceder dempués. "Hai munchos compromisos con munches empreses vincuales al centru: la tienda, les taquilles, la eletricidá... Yo nun sé si'l Gobiernu d'Asturies ye consciente de qu'esta instalación tien munchos gastos de caltenimientu, que cuerren al cargu de la Fundación", dixo Varela.

Tres les declaraciones realizaes ayeri por Enrique Sánchez Sostres, candidatu de Foru al Congresu, l'alcaldesa avilesina afirmó que'l partíu d'Álvarez Cascos "decidió que'l centru forme parte de la campaña y a mi resúltame llamentable. Ésta nun ye una cuestión ente partíos y dígolo por activa y por pasiva. Equí ta en xuegu la llegalidá d'una Fundación, una Fundación que vien desarrollando un trabayu estraordinariu a lo llargo de cinco años sin nengún problema, y tolos problemes surden pola ubicación del Gobiernu d'Asturies nesta Fundación".

L'alcaldesa insistió en que la vía del acuerdu "ye la que pue llevamos a una solución. Si'l Gobiernu d'Asturies decidió qu'esto vaya per vía xudicial va ser una decisión del Gobiernu d'Asturies, pero pue tener el centru paralizáu munchos años. Non meses, sinón años".