Galicia, xunto con Asturias, Cantabria e Euskadi editaron a primeira fase dunha guía para a vixilancia da saúde no sector pesqueiro, un manual "moi especializado que concreta os riscos inherentes a cada traballador segundo a modalidade de pesca, o seu posto e as tarefas que desenvolve", segundo explicou a conselleira de Traballo e Benestar, Beatriz Mato.

Mato, quen participou este luns na presentación do libro, realizada no Instituto Galego de Seguridade e Saúde Laboral (Issga), afirmou que a obra ten o obxectivo de orientar e dar unha correcta orientación así como instrumentos para poder implantar a vixilancia da saúde dos traballadores do mar, detectar enfermidades profesionais e facilitar a avaliación de riscos.

De igual modo, a obra incide na necesidade de establecer os mecanismos que faciliten a coordinación entre os diversos axentes involucrados na vixilancia da saúde destes traballadores.

A guía contén unha serie de fichas nas cales se analizan posibles danos para a saúde así como as probas médicas que se recomenda realizar en relación aos riscos ergonómicos, hixiénicos, físicos, químicos e psicosociais de cada posto de traballo. Na fase presentada este luns abórdanse os ámbitos da pesca de baixura e artesanal. RECOÑECEMENTO

Segundo recordou Mato, na actualidade, o método para comprobar o estado de saúde físico e psíquico das persoas que traballan no sector pesqueiro limítase a un recoñecemento médico previo a embarcar, o cal é realizado por facultativos do Instituto Social da Mariña. Por iso, non hai unha vixilancia continuada da saúde respecto aos riscos ao que este persoal está exposto, tanto nos buques coma no porto.

Se se compara co resto de sectores, a pesca rexistra un alto índice de incidencia de accidentes de traballo graves e mortais —mesmo duplica o da construció—. Ademais, cada vez tense coñecemento de máis enfermidades profesionais declaradas polos traballadores deste ámbito, e como poden ser as derivadas do ruído, de posturas forzadas e da realización de movementos repetitivos.

Por iso, as catro comunidades autónomas, que suman 2.400 quilómetros de litoral —1.500 en Galicia— lanzaron esta guía específica de vixilancia da saúde para cada tipo de actividade dentro do propio sector: pesca de baixura e artesanal, marisqueo a piei, grande altura e actividades auxiliares.

Baixura e pesca artesanal

Segundo explicou Mato, a primeira fase dedicouse á baixura e pesca artesanal por ser as áreas que empregan un maior número de persoas e ser ademais o ámbito onde se estima que o sistema de prevención da saúde está menos desenvolvido —en parte por tratarse na maioría dos casos de traballadores autónomos—.

A guía foi realizada por un grupo multidisciplinar de técnicos de prevención e de médicos do traballo dos institutos de seguridade e saúde laboral das catro comunidades. En total, centráronse en 10 especialidades, como son os riscos asociados concretos, a súa atención específica en materia de prevención, os perigos de cada posto de traballo e cada tarefa que aborda o operario, seguindo os principios da Lei de Prevención de Riscos Laborais.

En España existen preto de 40.000 traballadores dados de alta no réxime especial do mar, dos que máis de 19.000 —máis do 50 por cento— pertencen a algunha das catro comunidades que editan o documento. En Galicia hai 7.600 afiliados ao réxime especial que traballan na pesca costeira e de baixura.

Nestas catro autonomías a flota total ascende a 5.968 buques, dos que 5.198 son galegos —o 80 por cento deles son pequenos, dedicados á pesca de baixura e artesanal—, 339 asturianos, 168 cántabros e 263 do País Vasco.