La vocera de Sanidá del Grupu Parlamentariu Socialista, Pilar Alonso, fixo esti vienres un nuevu llamamientu pa que se recupere'l diálogu y pueda evitase la fuelga na sanidá asturiana, yá que indicó que la mesma ten de ser "l'últimu recursu".

"Nun conflictu como esti la fuelga ye l'últimu recursu, porque nuna fuelga na Sanidá, la víctima, nun ye'l Gobiernu o los trabayadores, nun son nesti casu les partes, la víctima siempres son los usuarios", dixo Alonso qu'ufiertó una rueda de prensa.

Nesti sentíu la diputada socialista incidió en que la Conseyería de Sanidá nun se llevantó de la mesa de negociación y felicitóse de les últimes declaraciones realizaes tantu pol SESPA como polos responsables sindicales qu'abandonaron l'encierre teniendo en cuenta que dambes partes amuesen la so disposición a retomar el diálogu.

Respectu al alcuerdu Alonso indicó que "sí hai delles coses clares", ente elles que "hai que cumplir la llegalidá impuesta pol Gobiernu d'España, porque lo que nun se puede ye incumplir la llei y que los axustes qu'hai que facer nun pueden ser por mor de la calidá del serviciu a los usuarios, nin del empléu estructural, nin de los elementos que configuren la retribución básica de los emplegaos".

"A partir d'ende, tien qu'haber una negociación abierta, na que, como en cualquier negociación, va haber cesiones per dambes partes", dixo Alonso qu'aportunó en que "el verdaderu problema de la Sanidá pública son los retayos del Gobiernu de Rajoy".

Nesti sentíu consideró que'l discursu que'l PP asturianu caltién n'Asturies sobre los servicios sanitarios topeta colos enormes axustes qu'impón l'Executivu d'España, del so mesmu signu políticu.