Tatexo coma ti

Vaia por diante que son das que odia oír na tele iso de que Rajoy fue muy gallego contestando unha entrevista. Pero dáme a impresión de que por aí diante teñen unha visión dos galegos un pouco sesgada. Parvos? Algúns. Tatexos? Talvez prendamos na fala un pouco máis que o resto da xente.

Mais tamén traballadores, cosmopolitas, bos, xenerosos, acolledores... Vale, seguen sendo tópicos, pero se os tópicos que puxese o DRAE fosen estes, pediriamos tamén que os quitaran? A connotación positiva nunca lle fixo mal a ninguén. Ademais ningún idioma que non sexa o galego poderá nunca definirnos como realmente somos: ou alguén sabe a tradución de túzaros, riquiños, miñaxoias...? Nosoutros ben que a entendemos. É o que nos pasa, que na nosa lingua xa non tatexamos tanto.