Arremellar ye un d'esos verbos asturianos de mui difícil traducción. Pa que lo entienda quien pudiera lleer estes lletres per primer vez, ye dalgo asina como clavar la mirada, quedase fixu, colos güeyos mui abiertos, espresando sorpresa, plasmu o gran atención. Pues bien, falando ocularmente, respigándome cola noticia, nun pudi facer otro qu'arremellame cuando la prensa, estos díes, relataba que la llei del talión diba aplicase con plena vixencia y de la manera más metafórica y cruel, echáu yá a andar el sieglu ventiún. Y ye que va de güeyos la cosa. Él, celosu, machista y arguyosu, quemába-y la vista y la vida a ella, moderna y futura inxeniera nesi Irán que tan mal lleva lo de despegase del axetivu ranciu. Pero yá ven, la que nesta hestoria representaba la parte del cambiu, nel so dolor, acaba zarrando'l bucle, solicitando pal primeru la mesma pena qu'ella sufriera. Y cuenten que'l xuez lloró al sentencialu con venti gotes d'ácidu, cuenten que lloró coles llágrimes que nengún de los protagonistes yá nun podrán llorar.