O feito sabido de que case sempre, nas nosas relacións sociais, aquilo que calamos ten máis relevancia có que dicimos, valeulle ó meu amigo Spoke, na súa visita semanal, para referirse ós silencios do noso mandatario local á hora de facer balance do seu primeiro ano de goberno. Se presume de falar tódalas semanas por teléfono co ministro coruñés de Cultura, e non de facelo case a diario co presidente da Xunta, nin a todas horas (é un dicir) co vicealcalde de Vigolandia, non nos estará querendo dicir algo? Cando se atribúe publicamente o mérito de converte-la paisaxe desta cidade nunha instalación quilométrica de toupeiras, que falan, con ostentación, da súa aposta polo tráfico privado, e obvia referirse ó cambio climático (por exemplo), non nos estará enviando unha mensaxe? E cando entre os seu logros silencia a xesta que suporá a consecución da candidatura para a Universiada 2015, ou a traxectoria heroica (por tráxica) do equipo celeste por antonomasia, non o fará por modestia? A Spoke sóbranlle as respostas.