Hai dous feitos recentes que, segundo o meu amigo Spoke, deixan ben ás claras a visión que do futuro teñen os que nos gobernan en Vigolandia; un futuro que deriva, necesariamente, da súa forma de xestiona-lo presente. Son, dime Spoke, deterministas, e o determinismo é, tamén necesariamente, unha miga involutivo. Iso explica, aínda que de mala maneira, que a derrota na carreira para facerse coa Universiada do 2013 leve, sen mediar reflexión ningunha (coma se dun plan previsto se tratase), a postularse para a que terá lugar no 2015. Porque perdín gañarei, deben pensar. Pero para que á segunda vaia a vencida haberá que gastar máis cartos e amarra-los votos dos xuíces, signifique isto o que signifique. Estamos no de sempre. Onde seguiremos, cando, dentro de tres anos, como está previsto, e paralelamente á nova ofensiva a grande escala de cara á privatización do submundo local, o espazo ocupado pola XER (a antiga ORA) sexa, practicamente, o dobre do actual. Penaliza-lo uso do coche no centro da cidade, fomentándoo?