Un mes de maio coma este que está a piques de rematar, hai cincuenta anos, nacía en Vigolandia un músico en potencia, que, co paso do tempo, se convertería, e nisto falo por boca do meu amigo Spoke, no compositor de máis sona de cantos viviron nesta cidade na segunda metade do século pasado. A súa curta carreira, truncada no 1995 (con menos de corenta anos), deulle para exercer do seu, entre outros países, en Finlandia, Polonia, Francia, Alemaña e Portugal. Escribiu partituras para filmes, deu conferencias, gañou premios, organizou concertos, divulgou entre os viguícolas a chamada música contemporánea (a do seu tempo) a través de diversos departamentos de Xuventudes Musicais, colaborou con pintores, escritores e músicos como Jorge Peixinho e Julián Hernández, facendo da súa cidade un centro vivo, máis alá de calquera retórica publicitaria. Pero todo iso pasou, e agora del queda, nesta cidade desmemoriada, o seu nome na placa dunha rúa. Que este aniversario sirva para reincorporar a Macías á nosa paisaxe sonora.